|
| ||||
|
|
|
|
| |
KUAN LUN BAWANG/KELABIT/LUN DAYEH
|
Tabi' kuan kinanak-kinanak ku luk miak maca' babpat ini bang buri' tau. Ui ngerawe, do ui ngeletep aceh babpat kuan tau, pad bala tau na metutu' peh.
Ui ngimun website ini ngaceku ui pian ngegala' luk inau Tuhan bang ulun ku idi tetek ruma'ku. Ui manu, Tuhan tau Yesus inan ulek ngudeh Ieh nenima' susa' luk pangeh mangun, mangun bang ulunku.
Tuhan pian negku lutep maya' neneh idi na melili ku luk bang tana' ini. Ieh pian negku mangun ku saksiNeh arang pupuh tau idi arang pupuh baken teh.
Susa' luk pangeh mangun ngenau negku pedeket inan Tuhan peh. Trawe idi niatku, na ieh buro ratnan Tuhan peh. Ui pangeh ngeletep trawe, niat idi ulunku pad ui ngakem kuan Tuhan macing ui mate. Ui pian papu' anak-anak ku luk dei surga. Kekamen luk bang tana' ini na miak ngaro niatkupeh ngaceku ulunku ini kuan Tuhan mo.' Luk negku', Tuhan kuan. Ui na ngerawe ngamung kaya' bang tana' ini..iamo ngemung kaya' dei surga.
Idipun ku nalan ame' yapeh-yapeh pad Tuhan ruen ngerayeh. Bang lak sini, kaidueh awanku nengikak idi nengan bang tuda'-tuda' kemp ISCF /tebubpun luk baken agan tu pana' ui mula' luk ruen mangun ku guru' rayeh sekondari.
Ui ngimet mula kekamen/tugas baken ratnan kerja ku mangun ku guru' rayeh. Bang MMU/general Council SIB, ui ngurus ratnan binaweh tana' tau SIB. Ui pengerusi Rurum Guru kristen bang Miri teh. Ui ruen neteng mare kesaksian do bang Sarawak, idi pana' dei semenanjung teh. Awa Tuhan bang ulun ku.
Ulun tau ini, na tau kuan. We periteteng kuan amung lun tau pad muneng inan Tuhan idi nakap Neneh. Ui pian netau ngerawe amung luk ini:-
1. Aleg ngirup Beer idi pana' irup-irup luk nguit ngabuk ngaceku megala' bang surat Tuhan, ini miak ngerusak netau bang ulun idi anu tau. Mula' ayat-ayat ratnan irup bang Proverbs.
2. Aleg paset idi ngacau anak-anak decur ngaceku ini nguit netau melutak idi dat pa kiung Tuhan.Ieh kuit susa' luk meperuit dengan niat lun baken
3. Aleg mesido' niat. Tau lun bawang mesido' niat, ara' baden. Tau Na peduli' bada' dulun ngaceku ara' kala. Ini mesido' niat. Bada' lun baken miak nengan netau pad na tau mesusa.
4. Aleg ngerawe iko tatap ame' surga kudeng ulun tau panu' ku sala' ngaceku ieh ngebalih netau sebuleng. Kudeng tau na nengalap ulun luk mebaruh, tau ineh nateh inulun Tuhan. Agan tu pana' tau megei ame' tebubpun idi terlibat bang amung-amung tebubpun, kudeng ulun masih ulun luk mon, tau na teh miak ngalap babpat bang kekamen surga. Ngerawe do' do', kianlek, kareb tau mate napeh, ngadan tau na idih bang surat ulun ineh.
5. Aleg meremen.Mare kuan kekamen Tuhan. Amung bare tau luk manu idi nengalap Tuhan, na ieh mo' mo'. Ieh tatap semuet bang AKAUN luk dei surga. Inan samal kuan ide'-ide' luk mare kuan Tuhan, luk ulunneh do' pakiung Tuhan.
6. Aleg siayu! Ngaceku, tau na mepuit ratnan luk dat luk ruen tau. Kudeng tau ngenau luk dat, luk dat perurum netau idi mudeng bang takep niat tau. Siayu ineh aceh balih.
7. Do' tau ngerayeh TUHAN ALLAH bang ulun tau..ngaceku Tuhan pebala bang Samuel "I will honour those who honour Me." Tau na miak lun baken ngerayeh kudeng tau na ngerayeh idi ngedita' Tuhan bang ulun tau.
TAMAN IDI TINAN LUK MANU INAN TUHAN:-
1. Tuhan mare samal kuan tetek ruma'deh. Tuhan mare ileh kuan anak-anakdeh bang sekula.'
2. Tuhan mare peruan kuan tetek ruma'.Ieh mare ileh kuan tau pad tau inan ileh ngesa' idi matar anak-anak tau.
3. Tuhan pian netau mada' anak-anak tau ratnan Bala Tuhan pad ideh ngalap ulun ratnan Tuhan tau Yesus Keristus.,/font>
NEKELUPAN BERKAT TUHAN
Mula lun tau luk medita pakat na pian ame tebubpun peh. Kareb ideh bang sekula mon, pelaba geragan deh ame sembayang, iamo nekini, na ideh peduli' peh. Ideh pangeh nekelupan Tuhan Allah luk nemare peruan kuan tetek ruma' deh ngaceku taman tinan deh lutep sembayang idi manu Tuhan. Binaweh luk bang tana' miak ngebuser netau. Nenginita do do.
MADA' ANAK MU RATNAN TUHAN ALLAH
Atad apeh ke' tau miak mada' anak tau kudeng tau sendiri ara' ame' tebubpun? Miak ke' lun luk nebuser nguyut lun luk nebuser? Na miak!
Iamo' pian tau anak tau mate bang sala' idi ame neraka? Pian? Na tau pian, iamo tau na pian nguit nedeh matun Tuhan. Tau sendiri na mawa inan Tuhan. Anak tau nier ulun tau idi maya' gio tau. Ilungneh peh, iko na peduli' agan tu pana' iko kali, kudeng anak mu nate bang sala' ieh na miak ngalap ulun luk meruked.Iko tanggung. Atad apeh ke' tau mawa kuan anak tau sendiri.. na tau mada' nedeh ratnan Tuhan!
Anak tau na mileh bang sikula? Anak tau na inan disiplin luk do? Anak tau pelaba' dat? SEBAB NEH, IEH INEH, TAMAN IDI TINAN NA SEMBAYANG KUAN DEH. TAMAN IDI TINAN NA MAWA INAN TUHAN..NGACEKU INEH BERKAT TUHAN NA MACING KUAN TETEK RUMA'. TAU NA NOLONG LUN BAKEN..IDI PUN ANAK TAU NA NGALAP SAMAL LUK RATNAN TUHAN.
Surat Tuhan mada' "Samal kuan anak-anak, luk taman idi tiunandeh metot inan Tuhan. Ideh miak ngalap berkat ratnan Tuhan."
KUDENG IKO NA AME TEBUBPUN IDI NA MANU INAN TUHAN ALLAH, DO UREN IDI MATUN TUHAN KUDENG IKO MEI INAN ANAK-ANAKMU!
JAGA' DO' DO'
Ace lun tau ngirup dengan tuda' burur guru. Lei sineh, kereja bang kompeni shell/ oil and gas. Keburi neh, gadi guru pelaba isut. Gadi guru mepad kudeng kinula' raga akan uko' nidih. Ieh meman uko' nidih RM4000.00 sebulan keneh.
Ace kinanak lei sineh peburi negku ratnan sido' niat pupu tau luk ngakem bang shell idi kompeni oil and gas. Idi mula' gadi.. iamo mula' deh ngabud usindeh ngirup beer.. idi udung bulan mabud peh. Na ideh mare babpat pulu' kuan Tuhan. Na ideh pian ame' tebubpun nakap Tuhan idi mare ubur kuan Neh ngaceku nemare kekamen kuan deh.
Mula tau luk kereja bang shell pelaba ana' idi ngerawe gadi luk medita' miak ngacing ulun luk do' iamo kudeng tau nier anun luk mangun kuan mula' tetek ruma kinanak-kinanak luk kereja bang shell/ oil and gas..mesusa'...KUDENG TAU ngubur tau mula' gadi, idi na mare rayeh idi ubur kuan Tuhan, hasil tau..ieh ineh anak-anak tau na miak ngalap peruan luk Tuhan mare kuan lemulun luk manu, ngarayeh Neneh. Nier ide' ide' anak tau luk muneng inan Tuhan..ame yapeh anak deh? Ame universiti..ideh mileh...ulun deh do' idi miak ngawang niat taman tinandeh.
Ngerawe do' do', kudeng iko medita' gadi' idi medita' kekamen, do ngerayeh Tuhan idi mare ubur kuan Tuhan. Aleg ngerawe SHELL IS YOUR WORLD.
Be contented with what God gives to us.
ANUN BINAWEH MUYUH?
Binaweh tau ieh ineh anak-anak tau. Mula' tau mekelupan, anak-anak tau ineh binaweh tau.
Kudeng peh tau pian kali, anun binaweh tau, do tau nakap, anun luk meluun ruen tau. Anun luk meluun belien.
Kudeng tau na ngerawe ulun tetek ruma' tau, idi sikula' anak tau, ui ngerawe binaweh tau baken.
Mula tau ngebelanja' mula' usin kuan irup beer idi luk baken, pad tau mekelupan ngesa' tetek ruma tau.
Nangan anak muh. Ngesa' tetek ruma' Muh. Kudeng iko pangeh nengaweh idi inan anak, ALEG NAKAP DECUR BAKEN! Kudend peh tau nakap decur baken, tau nguit rusak kuan tetek ruma tau.
LUN TAU PINILI TUHAN ATUN PAD MIAK MADA PUPU BAKEN RATNAN KATU TUHAN
Tepun idi taman tau lemulun luk pun-pun nengalap Tuhan bang ulun deh. Ngaceku ineh, anak-anakdeh nengalap berkat idi samal ratnan Tuhan. Tuda' lun tau luk ngimet kekamen luk medita nekkini? Ini mangun ngaceku taman-tinan idi tepun tau manu Tuhan.
Iamo, mula' tau nekini ara' maya' Tuhan bang ulundeh. Ideh kudeng luk na manu Tuhan. Ideh meluun dat ratnan lemulun luk na nekali' Tuhan. Idi tau nier anun mangun kuan anak-anakdeh? Anak-anakdeh dat ulun, na mileh bang sekula idi ara' ame Tebubpun. Ulekneh, kareb tau luk ara' maya Tuhan Yesus mengered, anak tau na inan awa kuan tau ngaceku na ideh kali ratnan awa luk ratnan taman idi tinandeh. Na ideh pian ngesa' taman idi tinandeh ngaceku na ideh isa' kareb ideh isut.
Mula' pupu baken luk inaweh lun tau mesusa' ngaceku inan awandeh pelaba abuk idi ngulung. Ideh meraruh terawe ngaceku ideh ngerawe lun inawehdeh do ulun kareb ideh pun paweh. Ngaceku ineh inan tau nguit nedeh mado inan Tuhan peh.
Aleg mekelupan katu Tuhan kuan i Tamam idi tinam. Mada' katu idi do' Tuhan kuan anak-anak mu, pad inulmu ngalap peruan ratnan Tuhan tau.
MASUI ULUN LUK MERUKED DEI SURGA
Mula' luk tau ngelibal ULUN LUK MERUKED luk bire Tuhan kuandeh ngaceku pian ngalap ngadan, pian ngaweh lun luk na menu inan Tuhan Yesus idih luk baken teh. Mula' decur tau nengaweh lun luk na menu inan Tuhan, idi ideh ngelibal anudeh peh. Amung luk ini, mare puas niat tau selingageh mo'. Kareb tau mate, na ulek amung ini peh. Kareb tau tuped munung tanga' surga, na ngadan tau idi peh. Ngaceku tau pangeh nengelibal nenehku luk baken ngaceku nengerada' luk pinian burur.
Ngenita do'- do', aleg masui babpatmu luk dei surga.
UI NA MITI NEMUYUH
Kian lek, mula' tau luk manu Tuhan rat mon, musam ame tebubpun. Inan ara' ame tebubpun. Ideh mala, ideh mesala'. Ini mangun ku or deh kuan ide' luk nguit nedeh ame tebubpun.
Mula' lun luk manu pangeh nekelupan katu Tuhan. Inan pangeh ine' ku pelayan, pastor idi ketua sidang, iamo ideh pangeh meteneb. Kiuk-kiuk, awa tanah nginat ticu'deh matun ate, idi nacan ulun.
Bang aco kekiped, Tuhan na miti netaupeh. Kareb tau mutuh pad semuet bang tanga' surga, Tuhan Yesus pebala, "UI NA MITI NEMUYUH." Ngadan tau pangeh iniu'Neh.
MEBENEH NIAT IDI MULAI NIAT
Mikat tu-tu kuan tau luk mula' binaweh,medita gadi', tengadan idi medita' kekamen kudeng tau pian mebeneh niat. Ngerawe negku sebuleng, ui pian ungeng, ui pian sigapung iamo kekamenku na miak ngenau negku buro rat nelun. Ui neremuat ratnan nguyut Rurum Lun Bawang ngaceku ui pian mepuit ratnan luk mula'.Anid kua' ui mesti mutut gayam, mare trawe idi nguyut nelun. Ini ngenau negku ngenau kekamen ku lio-lio peh. Iamo', serabpu', dila' ku ini, ngeruat buri luk na do pedingeren peh, kareb ui na ngebeneh niat idi trawe ku pa kiung Tuhan. Kudeng tau pian mebeneh niat idi mulai niat, tau ngerawe Tuhan atun, pad inan tari bala idi luk ruen tau peh.
Ngudeh ui nguit netau ngerawe Tuhan atun? Ngaceku, Tuhan luk kuan amung-amung. Tuhan nganid ileh, nganid kekamen, nganid peruan idi tau maya' luk pinianNeh mo.'
Ku ngudeh tau ngerawe Tuhan? Ngaceku, LEMULUN MIAK MULUN MANGUN KU LEMULUN LUK MANANG BANG AMUNG AMUNG, KIAN MANGUN KU RACHA LUK RAYEH, KIAN MANGUN KU LEMULUN LUK MUTUT BISARA, KIAN MANGUN KU LEMULUN LUK TINGADAN IDI BAKEN BAKEN TEH, IAMO KAREB IEH MATE, IA MATE MEPAD KUDENG ACE LEMULUN BIASA'
Ate na mili' kekamen, na mili' pangkat..
NGENITA DO DO KINANAK
-----------------------
ULUN LUK NA MEBURA
Ulun luk mebura' ieh ineh ulun luk pian ngenau luk meluun ratnan (biasa). Lun luk kudeng ini pian meluun metaduk ratnan lun baken. Ngaceku pian meluun metaduk bang amung-amung, ulun idi traweneh na pian lun baken metaduk rat neneh. Ulun luk kudeng ini mepanu' ku gateh niat idi temeruh ngaceku inan lun baken meluun do idi metaduk rat neneh. Na miak na, ulun luk kudeng ini ngenau ace lemulun ngedaat neluun idi ngerusak nelun baken.
Inan lun ngate' nelun baken ngaceku ulun idi niat luk kudeng ini.
Ulun luk na mebura' ieh ineh ulun luk SIMPLE. Inan discipline of simplicity kareb tau manu inan Tuhan. Kudeng ulun tau simple, na mula' luk miak ngeraruh trawe tau. Tau na merapang ratnan kuyu luk pakai tau. Tau na merapang kudeng lun baken meluun taga, meluun mebala, meluun mekaya', meluun rayeh ruma', meluun mula' binaweh idi luk baken-baken teh. Tau tetap mawang niat kudeng lun baken metaduk rat netau. Kudeng tau inan awa luk ratnan Tuhan, ulun luk SIMPLE luk ruen tau mili.
ANUN BERKAT LUK BIRE TUHAN KUAN TETEK RUMA'MU
Anun peruan luk bire Tuhan kuan tetek ruma'mu? Mula lun mekelupan katu Tuhan. Kareb ideh mula' usin/medita' gadi', ideh mesaget mada' Tuhan luk nemare iamo' idi nuso usin ku luk baken. Inan luk ngukab Pub idi Night club. Inan luk ngirup beer idi ngulung. Inan meli 4D idi ngenau luk dat, ku usin luk bire Tuhan.
Kali rungen, kudeng tau ngebura' usin tau ku luk kudeng ini, berkat Tuhan na macing kuan inul-inul tau.
Berkat Tuhan macing lun inul-inul tau kudeng tau mare ulun, idi sebabpat usin tau kuan Tuhan. Nier anak-anak mu, pian deh sikula? Do ulundeh? Ningerdeh buri mu? Inandeh semuet universiti? Ngerawe do' do'. Aleg ngirup beer, ngulung. Aleg na ame' ngerayeh Tuhan, ieh ineh ame' tebubpun! Do metot inan Tuhan. Na miak na, berkat luk macing inan anak-anakmu BERGANTUNG ratnan anu mu inan Tuhan! SAMAL KUAN ANAK-ANAK LUK TAMAN TINANDEH METOT INAN TUHAN! (Bang Surat Bale'(amsal)
ULUN MEBERUH
Ui pian ngitun..kali mu ulun luk meberuh? Yesus mala ..tinganak meberuh. Ngudeh ini mesti kali tau? Ngaceku kareb tau tinganak meberuh idi teh NGADAN TAU YUDEN BANG BUKU ULUN LUK DEI SURGA!
SITUNGA
Inan ace keluarga luk isut. Aceh anak isut, anak decur bang tetek ruma' ineh. Kareb anak ineh isut, tinanneh nguit neneh ame tebubpun anid aco minggu. Iamo tamanneh ara' ame tebubpun. Kareb anak ineh ngitun tinanneh kungudeh tamanneh ara' ame', tamanneh meriruh. Tamanneh ame pub, didueh ame tebubpun aco minggu. Kareb umur anak ineh 13 lak, keburi taman nan awanneh, " Rat aco sinih, ui nguit anak kiteh di peh." Dat niat awan nidih iamo' na luk miak ruen. Tamanneh nguit anak decurneh ame pub. Anid aco minggu, anakneh ame maya' tamanneh ame pub. Awan neh ame tebubpun. Mio peh, kareb tinanneh pian nguit anakneh ame tebubpun, ara anak di. Keburineh, pelaba awang niatneh ame pub, ngaceku ideh miak ngalai idi papu' lemulun mula' dei. Mawang niat taman di.
Bang ace kareb, anak ineh met. Bang ieh met mebura, ieh ngecuk tinanneh nawar tamanneh. Anak ineh le le mate peh. Nangi' taman di kareb ieh necing iring anak nidih. Idi anak ineh nengitun, "Ama', maya' dalan ide' ui, maya' diyama' dih keh, atau maya' diina' di?" Idi anak ineh petacu mate. Tamanneh nangi, idi peburi, "MAYA DI TINAM IKO, MAYA DI TINAM IKO ! Iamo anak neh pangeh nate. Na ieh miak ninger buri' tamanneh peh.
Mula' tau kudeng ineh nekinih. Mula' taman idi tinan meberuh, ara' ame tebubpun! Anak-anakdeh na kali, ku miak ideh ame tebubpun atau na, ngaceku taman idi tinandeh mangun ku penginud deh. Kudeng tamandeh ara' ame tebubpun, ieh ngegala' taman na peduli ame' tebubpun atau na. Anak pana' ara' ame tebubpun. Ideh ngeraruh anak deh.
Kinanak ngerawe do' do', aleg nginuud!
ALEG NGERARU LAWE ANAK MU, NGUIT NEDEH AME TEBUBPUN PAD IDEH METOT INAN TUHAN!
| Site Tools |
|
|
|
|
|
Verse of the Day |
|
|
